Իր երրորդ գիրքը Նարեկ Մալյանը գրել է 10 տարվա ուսումնասիրությունից հետո:
«Սրտերի թագուհին» գրքում հեղինակը նոր տեսանկյունից ներկայացրել է արքայադուստր Դիանայի մահվան ու դրանից հետո եղած քարոզչական արշավը:
«1997 թվականին, երբ արքայադուստր Դիանան դժբախտ պատահարի պատճառով մահացավ, ես հանգստանում էի մի վայրում, որտեղ առանձնապես անելիք չկար: Իմ միակ զբաղմունքը հեռուստացույցն էր ու ես ամբողջ օրը ստիպված դիտում էի Դիանայի մահվան ու դրա հանգամանքների հետ կապված լուսաբանումը: Այդ ժամանակ չունեի բավականին գիտելիքներ, որ կարողանայի հասկանալ, թե ինչ է կատարվում: Բայց ես տեսնում էի անտեսանելի ձեռք, որը ուղղորդում էր ամեն ինչ, դասավորում և մատուցում այնպես, ինչպես պետք էր»,- նշում է գրքի հեղինակը:
Նարեկ Մալյանը շեշտում է՝ այս գրքով փորձել է ընթերցողին ստիպել քննադատական հայացքով նայել իրադարձություններին:
«Ձեռագրից մինչև տպագիր գիրք դառնալը երկու տարի է տևել: Հանգամանքների բերումով հետևել եմ արքայադուստր Դիանայի մահվանը, դրա շուրջ իրականացվող լուսաբանմանը, մոտ 10 տարի: Սկզբում ուսումնասիրությունները հոդվածի տեսքով էր, հետո դարձավ դասախոսության նյութ, որը ռազմավարական PR առարկայի շրջանակում կարդացել եմ համալսարանում, ապա ծնվեց գիրքը»,- ասում է Նարեկ Մալյանը:
Նարեկ Մալյանի գրական գործակալ Արևիկ Աշխարոյանը շեշտում ՝ Մալյանն արդեն իր ուրույն տեղն ունի հայ գրական աշխարհում. «Դրա մասին է վկայում այն, որ լույս է տեսնում արդեն Նարեկ Մալյանի երրորդ գիրքը: Այս տարի էլ լույս տեսավ «Սոդոմի Փիառը» գրքի հայերեն տարբերակը: «Սրտերի թագուհին» եկավ լրացնելու «Զրոյական կետը» գրքի հաջողությանը»:
Արևիկ Աշխարոյանը վստահ է՝ Մալյանի գրական ոճն ու պատմությունները ներկայացնելու դինամիկան կհետաքրքրի նաև արտասահմանյան ընթերցողներին: «Սրտերի թագուհին» գիրքը կմասնակցի միջազգային գրահրատարակչական տոնավաճառների:
Այս տարի Մալյանի գիրքը կներկայացվի Լոնդոնի ու Ֆրանկֆուրտի միջազգային ցուցահանդեսներին:
Արփի Մուրադյան