5 պատճառ գիրք նվիրելու համար

Ուսումնասիրությունները պարզել են , որ  2017-ին ամենից շատ կարդացել են Չինաստանում:

Պարզվել է, որ այնտեղ բնակչության 70% -ը կարդում է կանոնավոր: Ամբողջ աշխարհում մարդկանց 51%-ը, գոնե շաբաթը մեկ անգամ, գիրք է բացում: Սա պարզվել է GfK-ի առցանց հետազոտությունից հետո: Ուսումնասիրությունը անցկացվել է 17 երկրում` 22 հազար մարդու շրջանում:

1. Եթե դուք մտածում եք ձեր սիրելիների հուզական վիճակի մասին, ապա գիրքը լավագույն նվերն է: 

Օքսֆորդի համալսարանի աշխատակիցները հետաքրքիր փորձ են անցկացրել: Նախ մասնագետները  թեստեր ու վարժությունների միջոցով մարդկանց հասցրել են սթրեսային վիճակի, հետո զբոսանքի, լավ երաժշտության ու գրքեր կարդալու միջոցով մասնակիցներին առաջարկել են լիցքաթափվել: Փորձից հետո պարզվել է, որ  փորձի մասնակիցների 68%-ը սթրեսից ազատվել է կարդալով, 60%-ը` երաժշտություն լսելով, 54%-ն էլ` մեկ բաժակ լավ թեյ խմելու շնորհիվ: Պարզվել է նաև, որ փորձի մասնակիցների միայն 42%-ն է լիցքաթափվել քայլելու շնորհիվ: Նյարդերը թուլացնելու, լարվածությունից ազատվելու համար, ըստ մասնագետների,  բավարար է կարդալ ընդամենը 6 րոպե:

2. Գիրքն ունիվերսալ ու նորաձև նվեր է:

Գիրքը նոր գաղափարների ու թարմ մտքերի շտեմարան է: Այն հետաքրքիր ու հարմար նվեր է տարբեր նախասիրություններ ունեցող մարդկանց համար:

Վեպերը հրաշալի նվեր են ռոմանտիկների համար, բիզնեսով հետաքրքրվողներին կարելի է նվիրել բիզնես-ձեռնարկներ, ինքնակենսագրականներն էլ տարբեր ճաշակի ու հետաքրքրության մարդկանց դուր կգան:

Պատկերազարդ հրատարակություններ, օրինակ` կարելի է նվիրել նրանց, ովքեր շատ են սիրում ճանապարհորդել ու հետաքրքրված են արվեստով: Հեքիաթներն էլ հրաշալի նվեր են երեխաների, շատ դեպքերում նաև մեծերի համար:

3. Գիրքը դիվանագիտական նվեր է: 

Գիրքը հիանալի միջոց է նվերի հասցեատիրոջ հանդեպ ձեր վերաբերմունքը դրսևորելու համար: Սա ոչ միայն ուշադրության նշան է, այլև հիանալի հնարավորություն՝ ցույց տալու համար, թե ինչ գիտես այն մարդու  հետաքրքրությունների ու ցանկությունների մասին, որին նվիրում ես:

Սա նաև դիվանագիտական նվեր է: Օրինակ` մայիսին Վատիկանում, ԱՄՆ նախագահ Դոնալդ Թրամփի հետ հանդիպման ժամանակ, Ֆրանցիսկոս պապը նրան նվիրեց երեք գիրք, որոնցից մեկը էկոլոգիայի մասին էր: Դրանից հետո համաշխարհային մամուլը սկսեց գրել, որ դա «քաղաքական նշանակության նվեր» է:

4. Գիրքը նվեր է, որը կարող է դառնալ մշտական ուղեկից:

Գրքերը պիտանելիության ժամկետ չունեն: Գիրքը կարելի է կոնյակի հետ համեմատել: Այն ժամանակի ընթացքում չի կորցնում իր արժեքը, այլ հակառակը` թանկանում է:

Սա նվեր է, որը կարող է դառնալ ուղեկից անգամ ճանապարհորդությունների ժամանակ: Գիրքը լավ խմիչքի պես կլիցքաթափի ու կբարձրացնի ընթերցողի տրամադրությունը:

5. Գիրքը նման է համեղ կոնֆետներով լիքը տուփի, այն կպատմի նաև տիրոջ ստատուսի մասին:

Այդ հրաշքների շտեմարանը բացելով` դուք մեծ բավականություն ու հաճույք կստանաք: Բայց, որ շատ կարևոր է, այն միայն օգուտ կտա. ոչ մի կողմնակի բացասական  էֆեկտ: Կարող եք չայցելել հանրային գրադարաններ և ներբեռնել օնլայն գրքեր, այլ պարզապես կարող եք տանը ունենալ սեփական գրադարան: Որակյալ գրականության ժողովածուն շատ բան կպատմի դրա տիրոջ մասին:

Արփի Մուրադյան