«Corpus» հրատարակչությունը Վերածննդի ամենահայտնի դեմքերից մեկի մասին նոր գիրք է հրատարակել, այն կոչվում է «Լեոնարդո դա Վինչի»:
Իտալացի հանճարի նոր կենսագրությունը գրել է Վոլտեր Այզեքսոն, որը առավել հայտնի է Սթիվ Ջոբսի մասին գրած իր գրքով:
Հեղինակը գրքի մասին պատմել է «Աֆիշ Daily»-ին: Այզեքսոնը շատ երկար ժանակ է պատրաստվել այս գիրքը գրելու համար: Նա Դա Վինչիի կյանքն ու գործունեությունը ուսումնասիրել է ավելի քան 10 տարի:
Գրողը մանրակրկտորեն ուսումնասիրել է ոչ միայն նկարչի կյանքը, այլև նրա աշխատանքներն ու նոթատետրերը: Ավելի ուշ Վոլտեր Այզեքսոնը տեղափոխվել է Ֆլորենցիա սովորելու: Նա սկսել է հաճախ այցելել այն վայրերը, որտեղ դարեր առաջ եղել է նաև Դա Վինչին:
Հարցազրույցի ժամնակ գրքի հեղինակը պատմել է, որ Վերածննդի ամենահայտնի գործչի կենսագրությունը գրել է՝ հիմնվելով նրա նոթատետրերի վրա: Ամենի ինչ սկսվում է հենց ամենասկզբից՝ Դա Վինչիի ծննդից ու ավարտվում նրա մահով:
Այզեքսոնի խոսքով՝ որոշ մտածողներ Լեոնարդոյին առաջին հերթին դիտարկում են որպես արվեստագետ ու ափսոսում, որ նա այդքան ժամանակ է նվիրել գիտությանն ու ինժեներիային, որովհետև հակառակ դեպքում Դա Վինչին ավելի շատ կնկարեր:
Իտալացի հանճարի մասին Այզեկսոնը այլ կարծիք ունի: Նա վստահ է, որ եթե Լեոնարդո դա Վինչին ամեն ինչի մասին չունենար ֆունդամենտալ գիտելիքներ, նրա կտավները այդքան հանճարեղ չէին լինի: Օրինակ եթե Դա Վինչին փայլուն գիտելիքներ չունենար անատոմիայի մասին, ըստ գրողի, չէր «ծնվի» նրա «Մոնա Լիզան»:
Վոլտեր Այզեքսոնը «Աֆիշ Daily»-ին տված հարցազրույցում ասել է, որ Դա Վինչին իր համար միայն պատմական կերպար չէ: Նրանից կարելի է շատ բան սովորել: Հայտնի է, որ փոքր ժամանակ Դա Վինչին բավարար կրթություն չի ստացել, բայց զբաղվել է ինքնակրթությամբ: Վերածննդի շրջանի ամենաառեղծվածային դեմքը միշտ կազմել է հարցեր ու փորձել է գտնել դրանց պատասխանները:
Վոլտեր Այզեքսոնի կարծիքով այս մեթոդը կարող է մեզնից յուրաքանչյուրը կիրառել:
Արփի Մուրադյան