Չինաստանի Չունցին քաղաքում բացված Chongqing Zhongshug գրախանութը իսկական երազանք է:
Գրախանութը գրքերի քաղաք է հիշեցնում: Chongqing Zhongshug-ում գրքերը ձգվում են գետնից մինչև առաստաղ, ինչպես երևում է լուսանկարներում:
Գրախանութի ստեղծմամբ զբաղվել է X + Living ճարտարապետական ընկերությունը, որը ներշնչվել է չինական մեգապոլիսներով: Միայն Չունցինում, 2016 թվականի մարդահամարի համաձայն, ապրում է ավելի քան 30 միլիոն մարդ:
Chongqing Zhongshug- ը ընդարձակ տարածք է, որի ձևավորման մեջ գերակշռում են մուգ երանգները, փայտը և մետաղը: Տարածքը ձևավորելու համար օգտագործվել են նաև հայելիներ: Դրանք տեղադրվել են առաստաղների, աստիճանների ու պատերի մեջ:
Ճարտարապետները այս հնարքի շնորհիվ կարողացել են ստանալ գրքերի անվերջության պատրանք:
Խանութի աստիճանների ուղղահայաց ու հորիզոնական ձևը կարծես հիշեցնում է նկարիչ Էշերի վիմագրությունները: Այսինքն հատվող աստիճանների հաջորդականություն, որ ոչ մի տեղ չեն տանում:
Գրախանութում տեղ կա նաև երեխաների համար: Խանութի այդ հատվածը իհարկե, այնքան էլ սյուրռեալիստական չէ: Լուսավոր է, պարզ ու թեթև ձևավորված:
Հետաքրքիր է նաև այն, որ Chongqing Zhongshug-ում այցելուները կարող են վայելել զովացուցիչ ըմպելիքներ, սուրճ և խորտիկ:
Կից լուսանկարներում պատկերված են Chongqing Zhongshug-ի հատվածներ: Լուսանկարների հեղինակը լուսանկարիչ Shao Feng-ն է:
Արփի Մուրադյան