Bestseller ռեվյու
Պե՞տք է սեփական ես-ը գտնելու համար կտրել անցնել օվկիանոսն ու նոր կյանք սկսել մեկ այլ երկրում: Ի՞նչ եք կարծում, հնարավո՞ր է ձանձրալի գյուղական կյանքը թողնել անցյալում և միանգամից դառնալ ժամանակակից լուսավոր ու աղմկոտ քաղաքի էլիտար բնակիչ: Նոր մշակույթ, նոր մարդիկ, գյուղական տնակներին հակառակ` երկնաքերներ, աղմկոտ փողոցներ. Չիմամանդա Ադիչիի նոր վեպը երկու զուգահեռ աշխարհների մասին է: Հերոսներն արտագաղթում են Նիգերիայից և հայտնվում Ամերիկայում ու Անգլիայում: Գեղեցկուհի Իֆեմելին ծնվել է Նիգերիայում, որտեղ ռազմական գործողություններ էին ընթանում: Աղջիկն ավարտում է դպրոցն ու մեկնում Ամերիկա` ավելի բարեկեցիկ կյանք գտնելու: Օբինզեն ու Իֆեմելին երկար ժամանակ սիրահարված էին: Ռազմական գործողությունների սրման պատճառով տղան չի կարողանում աղջկա հետ մեկնել: Մնում է Նիգերիայում, ավարտում համալսարանն ու մեկնում Ամերիկա` իր սիրելիի հետևից: Սեպտեմբերի 11-ին Ամերիկայում ահաբեկչական գործողությունները փոխում են չվերթի ուղղությունը, Օբինզեն հայտնվում է Անգլիայում, որտեղ սկզբնական շրջանում ստիպված է լինում անօրինական փաստաթղթերով գոյատևել: Տարիներ անց Օբինզեն հարստանում է և դառնում հայտնի, մինչդեռ Իֆեմելին բլոգ է վարում` Ամերիկայում հայտնված ներգաղթյալների մասին, ինչն էլ աղջկան մեծ ճանաչում է բերում:
Վեպն արտագաղթելու և երջանիկ կյանք գտնելու մասին է, այն մասին, թե ինչպես են փոխվում հայրենիքի և տան մասին պատկերացումները, երբ հայտնվում ես օտար երկրում: Գիրքն առաջին հերթին սեփական ես-ը գտնելու մասին է, և միայն հետո` սիրո մասին:
Իֆեմելին կարճ ժամանակահատվածում ստանում է քաղաքացիություն և դառնում ամերիկացի: Իր բլոգում գրում է սևամորթ ամերիկացիների և սևամորթ գաղթականների մասին: Բլոգի նյութերում աղջիկը պատմում է մազերը խնամելու բնական միջոցների մասին և օրինակ բերում աֆրիկյան կանանց, որոնց մազերի խնամքը իսկական գլխացավանք է: Էֆեմելին հաճախ խոսում է ռասիզմի դրսևորումների մասին և նշում, որ ռասիզմը չի վերացել, այն ինչ-որ տեղ խորը ապրում է մարդկանց մեջ: Իր մաշկի գույնի պատճառով չի կարողանում աշխատանք գտնել:
«Ամերիկանա»-ն միայն ռասիզմի մասին չէ և ոչ էլ միայն սիրո: Ես-ի փնտրտուքի մասին է: Հատկապես հետաքրքիր է հեղինակի այն նկարագրությունը, որ հերոսները սեփական ես-ն ու երջանկությունը փնտրելիս վերադառնում են իրենց հայրենիք` Նիգերիա:
Ադինչին ներկայացնում է այն մարդկանց, որոնք երջանկությունը տեսնում են միայն հայրենիքից դուրս, գտնում նոր հայրենիք ու ապրում` մոռանալով անցյալը: Զուգահեռ ներկայացնում է նաև նրանց, ովքեր, չնայած հարստությանն ու հայտնիությանը, վերադառնում են տուն: Ադիչին պատմում է մարդկանց մեկ այլ տեսակի մասին. նրանց, ովքեր ընտելացել են նոր մշակույթին ու դարձել դրա մասնիկը: Վեպի հերոսներն իրենց երջանկությունը տարբեր կերպ են որոնում: Հերոսները փորձում են խառնվել ամբոխին, հաղթահարել դժվարությունները, փնտրում են սեր, որն իրենց կփրկի կործանումից: Ադիչին կոտրում է այն վարդագույն կարծրատիպը, որ կյանքը հրաշալի է օտար ափերում: Հեղինակը ցույց է տալիս մեդալի հակառակ երեսը` որտեղ ամեն ինչ հեքիաթային և հեշտ չէ: Ընթերցողն առերեսվում է հերոսների չքավոր կյանքին, նրանց հետ հավասար վերապրում դժվարությունները, սթրեսի ենթարկվում, զգում, թե ինչ է միայնությունն ու անօգնական վիճակը:
Հերոսները չեն կարողանում հաղթահարել այս փորձությունները, վերադառնում են հայրենիք և այնտեղ գտնում իրենց երջանկությունը: «Ամերիկանա»-ն նման է ճամփորդական ուղեցույցի, սակայն մի տարբերությամբ. այն ցույց է տալիս ես-ը գտնելու ճանապարհը:
ԲԵՍԹՍԵԼԼԵՐ
bestseller.am
Ռեվյուներ
Ռեվյուներ չկան։